Toptube Video Search Engine

「腦細」林日曦最新舞台劇即將公演，不過，今次的新搞作多了一個女主角田蕊妮。一場「夫妻」，兩齣舞台劇，分別是田蕊妮的舞台獨腳戲《大離婚日-妻》及林日曦視像演出的獨腳映畫戲《大離婚日-夫》。《娛壹》訪問田蕊妮，由以婚姻為主題的舞台劇，談到她到真實的婚姻，戲中劇情出人意外，現實人生更是無常，要活在當下。 【與杜汶澤在台灣生活 重拾夫妻感覺】 老公杜汶澤（阿澤）於2020年移居台灣，田蕊妮當時未有跟他到當地生活，不過，2021年飛台灣與老公慶祝生日後，她改變了想法。 「我最初都係諗兩邊飛吓，但後尾我發覺同老公一齊真係太開心，所以如果可以嘅話，都想同老公一齊生活，當然其實好近啫，但係佢好需要我。」田蕊妮口中的一句「佢好需要我」，聽到令人毛管戙，係愛定係責任？一聽就知係愛啦！ 田蕊妮與阿澤結婚近十八年，不過，講到一起生活，就要重新學習怎去相處，「以前喺香港，好多時我哋住喺同一間屋，但其實好少見，因為大家嘅時間真係好唔夾，一齊住我哋反而要約㗎！我而家喺台灣同佢一齊住，真係一齊瞓覺、一齊起身、一齊食飯！當然你話有拗撬一定會啦，但係唔知係段關係耐咗，定係佢大個咗、我又大個咗，我覺得同佢嘅相處仲舒服過以前！」田蕊妮再肯定地表示，阿澤去到邊，她便會跟他去到邊，只要與他在一起，甚麼都沒問題。 放下過去的視后光環，田蕊妮在阿澤鼓勵下，為他管理「喱騷」，更做埋節目監製，擴闊了視野，才切身感受阿澤一直所做的事，「我而家先至了解佢做緊啲乜嘢，之前係我有我拍嘢，佢又佢拍嘢，拍完嘢返到嚟都好攰，跟住第二朝又起身，咁樣又見唔到，有啲嘢你過咗你就唔講，你就唔會溝通。而家成日對住，佢做一間公司或者做生意，都會令我欣賞到佢好叻嘅地方！或者睇到佢解決問題或困難，原來係可以咁樣。我明白做一盤生意真係唔容易，亦會有壓力，一齊做嘢反而會對佢多咗了解。加上大家兩個人，冇乜依靠，係要互相支持、互相鼓勵吓，最緊要係陪伴，無論咩嘢事都好，有個人一齊喺側邊其實都好難得。」 以前在香港，田蕊妮和杜汶澤各有各忙，回家休息也是各自修行。去到台灣，一起生活，相處時間多了，感情更勝從前，重拾夫妻感覺，是意外收穫。 【做人要有目標 不用有計劃】 眼前的田蕊妮，多了一份寫意，「自在人生」四字好像刻在她的額頭一樣，「我諗係我個心態唔同咗？生活方式唔同咗？放鬆咗囉！譬如以前你喺電視台嗰度，會諗我要拍啲咩嘢劇、我要做啲乜嘢、我點樣去sustain自己嘅一啲形象、事業！而家我無去諗呢樣嘢，諗嚟都多餘，或者有嘢發生嘅時候先至再去諗，而家反而無諗到咁長遠嘅嘢！」 世界在變，在時代巨輪下，田蕊妮亦在自我調節中，「唯獨是一樣嘢trigger，可能呢幾年，有好多嘢，時間會過得好快，好似有好多嘢都無做，但又好似做咗好多嘢，有好多嘢你諗唔到會發生，但其實佢又會發生，所以真係計劃追不上變化，呢句說話已經陪伴咗我幾年！我有一個做人嘅目標，但係我唔會計劃得好詳盡。坦白講，我唔想框死自己，因為所有嘢都會變，今日唔知聽日事，我反而無去諗咁多呢啲嘢，煮到埋嚟先至食啦！」 【《大離婚日》大膽嘗試】 若非活得自在隨意，她未必會參與舞台獨腳戲《大離婚日》。談到該演出，到底甚麼是結合映畫拍攝手法及舞台劇效果的實驗性創作？田蕊妮碌大雙眼，認真地說：「我最初去到日本，第一件事都係問佢呢個問題，因為我都唔知道究竟《夫》係咩嘢嚟㗎，我覺得林日曦今次實在好大膽。」 田蕊妮口中的大膽，是指林日曦以視像形式去演他的獨腳映畫戲，還即場劇透了少少，「其實嗰件事係好合理嘅，個丈夫唔喺現場，其實係同個劇情有關，所以個老公係唔應該喺現場，佢係去咗第二個空間，係咪好懸疑？佢用一個映畫嘅形式去表達『夫』呢樣嘢係合理嘅，而其實佢又唔淨係映畫咁簡單，佢仲會加一個舞台劇嘅效果去配合佢呢個映畫。」聽田蕊妮講完，明啲唔明啲，好奇反而有所期待。 【論林日曦：我諗佢係一個好難笑嘅人】 首次與林日曦合作的田蕊妮，究竟當初怎被對方打動而接受邀請？她聞言大笑，反問：「我唔難打動，好難打動嘅咩？」田蕊妮講，林日曦早於2021已找她合作，可惜當時因遇到不同問題而擱置，「之前嘅plan就唔係獨腳戲嚟嘅，係成班人一齊做嘅舞台劇，但因為疫情，跟住又好多嘢要close，加上排練嘅時間又就唔到，最後無發生到。後尾佢自己因為有太多嘢要夾，覺得好麻煩，佢自己就做咗個獨腳戲，叫《大初戀日》。」 田蕊妮說，講夫妻關係的婚姻獨腳戲是她一直想做的，可惜，因為她本人的惰性太高，創作力又不是太強的關係，只可將它放在心裏，「好多年前我去英國旅行，喺一個好細嘅劇場睇過一個Broadway show，係一個大約五十幾歲嘅女人坐喺一張櫈，冇乜setup，後面就淨係一塊布，但係嗰塊布係不停會轉換。佢一嚟坐低，側邊有一本書，有一杯茶，有一盞燈，好elegant咁樣坐喺度，開始講佢同老公由相識到結婚，我覺得好好睇，成日都覺得如果我自己第二時上咗年紀，可以做一個咁樣類型嘅騷，一路都好想嘗試。」因此，林日曦邀請她演出，便二話不說答應。 早前為了排戲，田蕊妮飛到日本與林日曦日對夜對了六個星期，當時她是這樣想：「吓！我一個去日本？我同你林日曦又唔係真係咁熟，我又唔識得日文，好驚喎，係咪騙案嚟㗎呢單嘢？」田蕊妮坦言，在日本排練的日子有開心亦有不開心，但幸好總括來說都很順利，沒有她想像中這麼困難，最重要的是，她的確享受其中。 田蕊妮多謝林日曦連日來黑面對待，「我諗佢係一個好難笑嘅人，同佢排戲好慘㗎，因為佢塊面好黑㗎！但係我都有令到佢笑，係成功嘅。我覺得一樣嘢係好嘅，每一日你入到排練室，對住一個咁黑面嘅人，你都做到嘅話要做嘅，訓練到如果嗰一日啲觀眾嚟到冇反應，我都唔會驚，唔會影響我演出！」 【同是天秤座 相處沒問題】 同是天秤座的田蕊妮與林日曦，二人的生日只差兩天，跟林日曦的基本相處沒有任何問題，「佢好體貼，亦都安排得非常之好。」不過，田蕊妮補充：「唯一要適應的係佢每分每秒都喺度改，嗰個改嘅頻率係每一分每一秒。我覺得有陣時創作嘅嘢係需要改，但佢真係改得好犀利，《妻》呢個劇本，我都唔知道佢自己改咗幾多稿！我哋再圍讀，再對再排，佢有好多考慮，呢一樣嘢我好佩服佢，因為我覺得佢個直覺好準，同埋佢都會睇吓我究竟啱做啲咩。」 田蕊妮更以「叫外賣」去形容林日曦，「譬如嗰場戲已經好好笑、好OK，佢梗係會好似嗌外賣咁，『阿田，我想呢度追加啲咩嘢』！佢口頭禪就係，『我想呢度可唔可以再追加啲咩嘢』！我作為演員，有陣時會覺得佢好煩，但係我作為佢嘅合作伙伴，又覺得喺佢身上學到一啲嘢，我好想好似佢咁！人係有惰性，會覺得嗰樣嘢OK，就會停止再鑽入去，但係佢係唔停嘅，我好希望可以感染到佢少少呢啲缺點，令我之後嘅人生可以變得更好。」 【離開大台後愛上演舞台劇】 獨腳戲的舞台劇，講求節奏控制，而且體力消耗很大，竟然對田蕊妮來說是沒有難度的事，「暫時我又唔覺得好難，我咁樣講會唔會好囂呢？」然後她想了一陣，說：「一個兩個鐘頭鬆啲嘅騷，一個人企喺個台嗰度做晒所有嘢，我唔只係做我自己嘅角色，我仲做好多個角色，仲要啲節奏，追嗰啲笑位，所以，我覺得最大嘅難度係體力上。」 2020年離開了大台後，田蕊妮翌年便參演舞台劇《聖荷西謀殺案》，自此之後，她便愛上演舞台劇，「我好鍾意舞台劇就係，你同觀眾喺嗰個moment，大家嗰種溝通同交流，嗰啲係拍戲或者拍劇，你唔會有嘅感受，所以其實上一次《聖荷西謀殺案》之後，我係好鍾意舞台劇。」 【唯一一件人生最有意義的事】 生活了幾十年，田蕊妮現在才明白，盡心工作但不用太緊張，「hea」是一種生活態度，「反而咁樣會令我放鬆啲，個人真係無咁tense，但係又唔等於無責任㗎喎。」 正如田蕊妮所講，做人不用有計劃，但一定要有目標，她又有甚麼目標呢？「我嘅目標就係想可以開心地做人囉！其實我45歲喇，人係會老嘅，成日都話個世界好無常，成日都話要接受無常、接受變化，呢個都係一個口號式，講就叻囉，活在當下，點呢？How？」田蕊妮這一問，的確當頭棒喝了一下，在時代變遷下活在當下，講的確易，試問又有幾多人做得到？ 田蕊妮續說：「後生嘅時候你唔會諗咁多嘢，但到你老嘅時候好多嘢要面對，父母嘅離去、自己老啦、身邊嘅人身體唔會好好等等，每一日都可能會有一啲好無常嘅事情發生，我咁講好似好悶，但我真係好想去學習真正接受無常，同埋真正嘅活在當下，呢個都係我嘅目標。」 阿澤在台灣的北投區開設了禪修中心，每逢週末都會免費開設禪修班給有興趣修行的人參與，惠澤的不只是民眾，田蕊妮亦是其中一個，「我好開心，因為我喺台灣有開始去share一啲自己禪修嘅經驗，做嘅時候你覺得真正可以幫到人嗰種開心，喺我嘅人生履歷入面，呢個係唯一一樣嘢我覺得我做得最有意義嘅一件事！」 「人生無常，要珍惜當下。」 如果做到真正的接受無常， 便會發覺，無常是人生中唯一不變的常態。 田蕊妮想做到，小編亦是。 撰文：肥A 攝影：凍檸茶 攝錄：igniz Make up: Meegan Seak Hair: Jude Lam Wardrobe: HARRISON WONG 除了 CLS，亦歡迎你用 Super Thanks 支持我哋繼續用心製作🫶 有你哋支持，我哋會走得更遠 1. 喺 YouTube 影片下方（即係Like Dislike的一行）點選「超級感謝」（Super Thanks）； 2. 選擇你想支持嘅Super Thanks金額，目前有：$HKD10、$HKD25、$HKD50、$HKD250四種選項； 3. 透過 App Store/Google Pay 來使用信用卡或預付卡購買，成功後畫面上會出現一個感謝的小動畫； 4. 而成功購買後，喺留言處亦會用彩色來凸顯你的留言，也會顯示你贊助的金額。 多謝你支持娛壹！☺ 你的支持❤讓我們得以繼續前行🙌 請訂閱《娛壹》Patreon： https://bit.ly/3hZtP25